У інтэрв'ю Прэзідэнт падрабязна расказаў пра вытокі ўзнікнення праблемы, расказаў пра дзеянні Беларусі ва ўмовах абвастрэння абстаноўкі, адказаў на беспадстаўныя абвінавачванні і выкрыў схемы, па якіх транзіцёры працуюць з тэрыторыі Еўрасаюза.
"У сучасным свеце брацца за зброю - гэта да смерці падобна, гэта самагубства, пагадзіцеся. І тым больш тут, у цэнтры Еўропы. І тым больш з Беларуссю. Паколькі тут заўсёды на гэтым кавалку зямлі ўсе войны разгортваліся, адсюль усё пачыналася. Што, гісторыя нічому не вучыць?" - заўважыў кіраўнік дзяржавы.
"Змагацца сёння супраць мігрантаў "Леапардамі" (танкамі. - Заўвага БЕЛТА)? Вы мне выбачайце. Мы з вамі, людзі ваенныя, разумеем, што такое сёння весці вайну з гэтымі няшчаснымі людзьмі на граніцы Польшчы, дапусцім, з Беларуссю і выстаўляць калоны танкаў. Зразумела, што гэта нейкая трэніроўка або шантаж", - сказаў Аляксандр Лукашэнка.
Паводле яго слоў, Беларусь гэтаму спакойна процістаіць: "Мы не задзіраемся, як некаторыя ў Расіі папісваюць і нашы збеглыя там з імі. Таму што мы ведаем, што калі, не дай бог, мы дапусцім нейкую памылку, калі мы спатыкнёмся, то гэта адразу ж уцягне ў гэты вір Расію. А гэта буйнейшая ядзерная дзяржава. Я не вар'ят. Я выдатна разумею, да чаго гэта можа прывесці. Таму ніякага тут няма гераізму - "схапіў аўтамат і пайшоў на польскую граніцу" (дарэчы, дзе я служыў у свой час пагранічнікам) - не, ні ў якім разе. Мы разумеем, мы ведаем сваё месца. Але мы на калені не станем".
Аляксандр Лукашэнка апасаецца, каб процістаянне на граніцы з-за мігрантаў не прывяло да нейкай вострай фазы: "Гэта ж глеба для правакацый. Любую правакацыю можна ўчыніць. Я ўжо сваіх ваенных папярэджваю: акуратна, хлопцы, глядзіце!".
Аляксандр Лукашэнка расказаў аб дзеючай у Еўрасаюзе мафіёзнай структуры па арганізацыі транзіту мігрантаў. "Едуць людзі, ідуць на граніцу. Вось яны ўчора, гэта ўпершыню было, каля 2 тыс., а можа крыху больш, сканцэнтраваліся ў розных месцах - у Мінску, у лясах… Іх падвезлі туды. Гэты транзіт забяспечваюць людзі: там у самалёт пасадзяць, самалёт сюды прыляціць, тут іх возьмуць, на граніцу адвязуць, цераз граніцу перавядуць і там іх прымаюць ужо свае - палякі, немцы, украінцы. І ўсё за грошы", - сказаў кіраўнік дзяржавы.
Прэзідэнт адзначыў, што адпаведныя паслугі транзіцёраў аплачваюцца. "Гэта ж не бедныя людзі едуць адтуль. А калі і бедныя, то ім сабралі грошы. І мы гэты ланцуг поўнасцю прасочваем. Тыя, хто ў Польшчы (іх жа яны ўжо злавілі і нават вымушаны былі аб'явіць, хто яны). Там не было беларусаў, і ўсяго два расіяніны. А дзясяткі транзіцёраў, якія людзей падкідваюць, - гэта немцы і перш за ўсё палякі, яшчэ і ўкраінцы, літоўцы. Інакш кажучы, свая мафіёзная структура, якая забяспечвае транзіт, - расказаў Прэзідэнт. - У іх ужо там у Германіі, Францыі, іншых дзяржавах гэтыя ячэйкі створаны. Яны патэлефанавалі адзін аднаму - прыязджайце, мы вас прымем. Там ужо іх чакаюць".
"Яны (мігранты. - Заўвага БЕЛТА) не едуць у пустое месца, не едуць у космас. Яны едуць канкрэтна да тых людзей, якія іх чакаюць у Германіі - у некага сваякі, сябры, яшчэ нехта. Калі хтосьці думае, што яны проста адурэлыя бягуць за тысячы кіламетраў, - гэта глупства. Усё гэта зладжана арганізавана. І Беларусь толькі этап у гэтым. І абсалютна не галоўны", - звярнуў увагу беларускі лідар.
У размове з Прэзідэнтам Ігар Каротчанка прыгадаў аб выказванні прэс-сакратара расійскага МЗС Марыі Захаравай на тэму міграцыйнага крызісу, дзе яна нагадала пра ролю Польшчы ў атаках на Ірак і прапанавала ім цяпер прыняць 2 тыс. бежанцаў з гэтай краіны.
Пагадзіўшыся з гэтым пунктам гледжання, Аляксандр Лукашэнка ўказаў на ролю краін Захаду ў разбурэнні шэрага дзяржаў Блізкага і Сярэдняга Усходу. "Гэта ж усё было на маіх вачах", - сказаў ён. Прэзідэнт нагадаў, што добра ведаў многіх лідараў, у тым ліку Хафеза Асада, Садама Хусэйна, Муамара Кадафі. "Мы з імі ў вельмі блізкіх, добрых адносінах былі. Мы сустракаліся з імі. Я вам скажу - вялікія мысліцелі, - адзначыў кіраўнік дзяржавы. - Гэта людзі, якія ў выніку свайго становішча вельмі добра разумелі, што адбываецца. Гэта былі лідары ў сваіх дзяржавах. І гэтыя нягоднікі іх проста забілі. Яны іх забілі".
"Башара Асада (Прэзідэнта Сірыі. - Заўвага БЕЛТА) яны таксама хочуць знішчыць. Так, гэта не Хафез Асад (бацька Башара Асада, які доўгі час кіраваў Сірыяй. - Заўвага БЕЛТА). Башар больш спакойны, доктар, вельмі добры і прыстойны чалавек. Але ён не пажаданы ім", - дадаў Аляксандр Лукашэнка.
Ён звярнуў увагу, што пасля расправы з лідарамі адбылося знішчэнне і саміх дзяржаў: "Помніце, Буш-малодшы (Прэзідэнт ЗША ў 2001-2009 гадах Джордж Буш. - Заўвага БЕЛТА)? Ім патрэбна было пераўладкаваць Блізкі і Сярэдні Усход. Яны ўварваліся. З Туніса ж пачалі (пра гэта цяпер не гавораць), у Іраку было - "Бура ў пустыні" і гэтак далей. Знішчылі фактычна краіну. Лепш зрабілі? Не. Потым яшчэ раз зайшлі. Туніс, Лівія, Сірыя. Потым дайшлі да Ірана, паглядзелі - не па зубах, не ўлезлі. Афганістан, 20 гадоў. І вынік?".
"Яны не проста разварушылі, расхісталі Блізкі і Сярэдні Усход, яны знішчылі дзяржаўнасць - тую, якая была. Так, спецыфічная. Не такая, як у Беларусі і Расіі, а тым больш у англасаксаў. Вядома, не такая. Свая спецыфіка", - канстатаваў беларускі лідар.
Аляксандр Лукашэнка падкрэсліў, што дзеянні калектыўнага Захаду не прывялі да паляпшэння жыцця ў тых краінах, куды яны ўварваліся. "Лепш стала? Яны ж дэманстратыўна гэта рабілі. Яны дэманстратыўна павесілі Садама Хусэйна. Яны на кол пасадзілі Муамара Кадафі, у мусульманскай краіне, мусульманіна! Гэта была наогул дзікасць. Яны знішчылі ўсё, што там было, уклад жыцця", - заявіў Прэзідэнт.
Відавочна, што ўмовы жыцця для многіх людзей у разбураных краінах сталі невыноснымі, і яны рушылі на захад. "Там самае страшнае - адсутнасць усялякай перспектывы. Уяві: дзеці, якая будучыня ў іх? Адукацыя? Ім нельга атрымаць. Аховы здароўя цяпер ніякай. Пра культуру, спорт і гаварыць няма чаго. Людзі асуджаны не на выжыванне, а на дзікае, жудаснае існаванне ў гэтай краіне і абсалютна беспрасветна ўсё. Што ім рабіць? Трэба шукаць лепшага жыцця. Так жывы чалавек заўсёды рабіў бы", - упэўнены кіраўнік дзяржавы.
Тым больш, як заўважыў Прэзідэнт, высокапастаўленыя чыноўнікі шэрага еўрапейскіх краін, у тым ліку Германіі, запрасілі мігрантаў: прыязджайце да нас. "Яны іх паклікалі. І пайшоў транзіт, - звярнуў увагу Аляксандр Лукашэнка. - Цяпер з Афганістана пайшоў прыток. Ён толькі пачаўся".
На думку Прэзідэнта, у хуткім часе варта чакаць яшчэ большага наплыву мігрантаў з Афганістана, у прыватнасці тых, хто працаваў на амерыканцаў, але каго ЗША адмаўляюцца цяпер прымаць у сваёй дзяржаве. "Амерыканцы іх таксама паклікалі, але загадалі Еўропе і Цэнтральнай Азіі (прыняць іх у сябе. - Заўвага БЕЛТА). Праўда, цэнтральнаазіяцкія рэспублікі сказалі: "выбачайце". Куды яны пойдуць? Яны пойдуць у Еўропу. Амерыканцы гавораць: няхай часова ў вас пабудуць. Як і казахам гавораць, узбекам, таджыкам і гэтак далей. Што такое часова, мы ведаем. Гэта ж амерыканцы", - адзначыў Аляксандр Лукашэнка.
"Вось пайшлі гэтыя афганцы: праз цэнтральнаазіяцкія рэспублікі, праз Расію, праз Беларусь і туды далей. І не толькі гэтым маршрутам, - прадоўжыў беларускі лідар. - Яны ідуць і праз Украіну, але Украіна ў іх (у калектыўнага Захаду. - Заўвага БЕЛТА) "свая", яны пакуль маўчаць. Беларусь - чужая, трэба малаціць, а тым больш у Лукашэнкі Пуцін за спінай стаіць і яго ўвесь час штурхае на Захад - так яны папісваюць, і міграцыйная гэта хваля - гэта гібрыдная вайна Лукашэнкі, якая падтрымліваецца Пуціным (на думку таго ж калектыўнага Захаду. - Заўвага БЕЛТА)".
"Пры чым тут Пуцін? Пры чым тут Лукашэнка? - адрэагаваў кіраўнік дзяржавы на беспадстаўныя сцверджанні. - Вы разбамбілі Афганістан і туды далей. Да Кітая дабраліся. Цяпер уваткнуліся ў Кітай".
Прэзідэнт яшчэ раз падкрэсліў, што мігранты накіроўваюцца ў краіны Захаду, куды іх паклікалі тыя, хто вінаваты ў разбурэнні іх родных мясцін. "Так, цяпер яны знайшлі "дзірку" ў Беларусі. Хочуць праз Беларусь папасці. Яны да нас прыязджаюць, прылятаюць абсалютна законна. Яны прылятаюць у аэрапорт, у які калектыўны Захад нікога не пускае са сваіх кампаній. Гэта значыць, яны для сябе закрылі беларускі аэрапорт. Але не будзеш ты, то будзе тры. Сюды дзясяткамі рынулі самалёты з Блізкага, Далёкага Усходу, з разбомбленых дзяржаў, - сказаў беларускі лідар. - Расіяне, кітайцы, іншыя - як ляталі сюды, так і лятаюць".
Такім чынам Беларусь забяспечвае работу сваіх аэрапортаў, а гэта праца тысяч людзей для абслугоўвання ўзлётна-пасадачнай паласы, стаянкі, тэрміналаў, забеспячэнне палівам. "Вы хацелі нас удушыць, - сказаў Аляксандр Лукашэнка. - Ну, добра, мы лятаем у Расію, Кітай, на Усход. Хоць ніводны самалёт "Белавія" сюды мігрантаў не прывёз. Яны на сваіх самалётах, на "Боінгах" лятаюць".
Аляксандр Лукашэнка звярнуў увагу на прыёмы адносна мігрантаў, якімі карыстаюцца сілавікі на баку Еўрасаюза: "Мы не страляем паверх галоў, як робяць яны. Нашы верталёты над імі не лятаюць. Што такое на вышыні 20-30 метраў праляцеў верталёт - там здзімае гэтых дзяцей, людзей. Іх запалохваюць проста".
"Вось іх аблічча. Яны заўсёды былі такія. Мы войны пачыналі?" - задаў рытарычнае пытанне беларускі лідар.
Ён звярнуў увагу, што цяперашняя сітуацыя - гэта яшчэ дробязь у параўнанні з тым, што рабілі, развязаўшы Першую і Другую сусветныя войны. "Гэта ж іх аблічча", - падкрэсліў кіраўнік дзяржавы.
Аляксандр Лукашэнка канстатаваў, што на франтах Другой сусветнай вайны загінулі многія дзясяткі мільёнаў чалавек, і не толькі ў Еўропе, але і ў Азіі. "Сі Цзіньпін (Старшыня КНР. - Заўвага БЕЛТА) нядаўна расказваў мне", - нагадаў кіраўнік дзяржавы.
Прэзідэнт растлумачыў нападкі на Беларусь жаданнем адцягнуць увагу ад сваіх уласных праблем у краінах Еўрасаюза. "Унутры Польшчы, Літвы. Вазьміце і Германію сёння - так званы транзіт улады. Вазьміце Вялікабрытанію, у Францыі… У іх жа праблем вельмі шмат. Мы побач з імі не стаялі. Народы незадаволены. А як гэта мікшыраваць і нівеліраваць? Трэба аб'явіць кагосьці ідыётам, падонкам, нягоднікам, які нападзе заўтра на тую ж Польшчу. Ды мы ніколі не збіраліся і не збіраемся нападаць на Польшчу. Нам дай бог уладкаваць гэту тэрыторыю, якая ў нас ёсць. А яны спяць і бачаць - усю (тэрыторыю Беларусі. - Заўвага БЕЛТА)", - заявіў Аляксандр Лукашэнка.
Да таго ж кіраўнік дзяржавы лічыць абсалютна нелагічнымі патрабаванні з боку Захаду, каб Беларусь нейкім чынам стрымлівала патокі мігрантаў: "Вы ўвялі супраць мяне санкцыі, супраць беларусаў. Вы пайшлі на гібрыдную вайну супраць Беларусі (СМІ, эканоміка, палітыка, ужо да ваеннага, бяспекі, дабраліся). І вы, нягоднікі, вар'яты, хочаце, каб я вас абараняў, ад мігрантаў у тым ліку?".
Прэзідэнт таксама звярнуў увагу на сітуацыю вакол дагавора аб рэадмісіі, які быў заключаны паміж Беларуссю і Еўрасюзам, але ў далейшым скасаваны з-за парушэнняў з боку ЕС. Хоць паток мігрантаў значна вырас: калі раней за год праз Беларусь маглі прайсці ў ЕС каля 80 чалавек, то цяпер, паводле даных еўрапейскіх структур, больш за 2 тыс. у суткі. "Дамовіліся, заключылі дагавор. Па гэтым дагаворы яны павінны былі пабудаваць у нас месцы знаходжання людзей, якіх мы па рэадмісіі забяром. І ўвёўшы супраць нас санкцыі, яны ўсё гэта кінулі і не фінансуюць, не будуюць гэтыя так званыя лагеры, - заўважыў кіраўнік дзяржавы. - Яны парушылі, яны выйшлі з гэтага дагавора. Я да гэтага не маю ніякіх адносін. Бягуць - няхай бягуць. Як гэта я іх сабе вярну і анклавы тут ствару? У мяне і так праблем хапае".
Акрамя таго, галоўнай мэтай мігрантаў, як ужо гаварылася не раз, з'яўляецца зусім не Беларусь. "Яны ж адкрыта гавораць: мы не ў Польшчу ідзём, нас у Германію паклікалі, мы ў Германію ідзём, прапусціце нас", - адзначыў Прэзідэнт. Аднак у адказ на гэта мігрантам даводзіцца зведваць на сабе жорсткія метады еўрапейскіх сілавікоў, абыякавасць і бесчалавечныя адносіны. На такія факты і звярнуў увагу беларускі лідар: "Адзін з польскіх кіраўнікоў нядаўна заявіў: "У нас каля 200 чалавек забітых мігрантаў". Гэта не адзін-два-тры чалавекі, а каля 200! Чаму аб гэтым свет не ведае? Чаму праваабаронцы ў Германіі, Францыі, Вялікабрытаніі, ЗША маўчаць? Чаму яны маўчаць? Чаму туды нават прадстаўнікоў сродкаў масавай інфармацыі не пускаюць палякі? Абвясцілі закрытую зону і нікога на граніцу не пускаюць. Усе гэтыя кадры і здымкі ішлі ў асноўным ад нас. Цяпер нехта там прарываецца праз іх і ўздымаецца ўжо гэты скандал і шум. Пры чым тут Лукашэнка? Вы ж збіваеце людзей, якіх вы туды паклікалі".
"Гэта добра арганізаваны працэс. І, дапусцім, патрабаваць ад мяне, каб я, як раней, за ўласны кошт аплачваў гэты працэс і спыняў яго… Менавіта спыняў, а не фінансаваў, як амерыканцы ўчора заявілі ці пазаўчора: я фінансую гэтых уцекачоў. Слухайце, у мяне грошай хіба мора? Няма куды грошы дзяваць? І наогул - факты на стол. Калі я фінансую, пакладзіце факты на стол. Але гэта ж амерыканцы, яны вялікія, языком ляпнулі і забылі, што сказалі", - заявіў кіраўнік дзяржавы. Ён падкрэсліў, што дапамогу мігрантам аказваюць простыя беларусы, прыносячы прадукты харчавання, ваду, цёплыя рэчы. "Так, дапамагаюць. І дзякуй богу. Таму што мы - беларусы", - сказаў Аляксандр Лукашэнка.
БелТА