У Беларусі пражываюць амаль 1,5 млн пажылых людзей

"На 1 студзеня 2021 года ў Беларусі пражывала 1 475 943 пажылыя грамадзяніны (ва ўзросце 65 гадоў і старэйшым). За апошнія дзесяць гадоў іх колькасць у цэлым па рэспубліцы павялічылася на 174 517 чалавек, або на 13,4 працэнта. Дзяржаўная палітыка накіравана на паўнапраўны ўдзел пажылых грамадзян у жыцці грамадства, прадаўжэнне іх актыўнага даўгалецця. Сярод занятых людзей ва ўзросце 65-74 гады жанчын - 51,9 працэнта, мужчын - 48,1 працэнта. Усяго сярод занятых 1,7 працэнта - людзі ва ўзросце 65-74 гады", - расказалі ў Нацстаце.

Сёння прафесіяналізм і жыццёвы вопыт старэйшага пакалення запатрабаваны ў розных сферах эканамічнай дзейнасці: дзейнасць у сферы адміністрацыйных і дапаможных паслуг - 3,2 працэнта пажылых людзей, аперацыі з нерухомай маёмасцю - 3,3 працэнта, адукацыя - 3,8 працэнта, ахова здароўя - 3,9 працэнта, вытворчасць вылічальнай, электроннай і аптычнай апаратуры - 4,1 працэнта, навуковыя даследаванні і распрацоўкі - 6,5 працэнта.

Важны фактар актыўнага даўгалецця - вядзенне здаровага ладу жыцця. Паводле даных выбарачнага абследавання дамашніх гаспадарак па ўзроўні жыцця, з кожным годам сярод пажылых людзей расце колькасць тых, хто займаецца фізічнымі практыкаваннямі або спортам. Акрамя таго, больш за палавіну пажылых людзей прытрымліваюцца рэжыму дня, а дзве трэці рэжыму харчавання.

Пажылыя людзі актыўна карыстаюцца інтэрнэтам. Сярод пажылых людзей, якія пражываюць у гарадах і пасёлках гарадскога тыпу, інтэрнэтам у 2020 годзе карысталіся 43,8 працэнта, сярод пажылых вяскоўцаў - 20 працэнтаў. Часцей за ўсё людзі пажылога ўзросту карыстаюцца інтэрнэтам для пошуку інфармацыі.

У мінулым годзе ва ўзросце 60 гадоў і старэйшым уступілі ў шлюбны саюз 937 жанчын і 1439 мужчын, пры гэтым у 718 выпадках абодва ўступіўшыя ў шлюб былі старэйшымі за 60 гадоў.

БелТА