Яе “батанічны сад” будынку да твару

Тэрэза Аляксандраўна  ўжо 14 гадоў працуе прыбіральшчыцай у Мажэйкаўскім сельвыканкаме. Да гэтага яна шчыравала лабарантам хімбаканалізу на мясцовым спіртзаводзе. Змяніла прафесію пасля таго, як на прадпрыемстве адбыліся пэўныя змены, і паслугі яе як лабаранта на ім не спатрэбіліся.   Тым больш, што  належнае выкананне і  адказны падыход да работы, дзе б не працаваў чалавек, дазваляе заслужыць пашану. Тэрэза Аляксандраўна ў поўнай меры ўсвядоміла, які абавязак на яе ўскладзены: не толькі анучаю пыл сціраць і швабрай вадзіць, а падтрымліваць,  як добрая гаспадыня ў доме, парадак у цэлым, імкнуцца, каб надаўжэй служыў праведзены рамонт, каб любому чалавеку прыемна было  зайсці ў памяшканне. Кветкі тут адыгрываюць немалаважную ролю. Дзякуючы прыбіральшчыцы, знайшлося месца амаль для пяцідзесяці вазонаў. Той, хто займаецца кветкаводствам, ведае, колькі часу неабходна затраціць, каб забяспечыць належны догляд  раслінам. Іх трэба правільна  і своечасова паліваць, апырскваць, сціраць пыл, рыхліць паверхню глебы, рэгулярна падкармліваць. А як беражліва трэба ставіцца да раслін пасля ўкаранення альбо перасадкі!
Тэрэза Аляксандраўна з поўнай адказнасцю выконвае ўвесь комплекс гэтых працэдур.
– Як папаўняеце свой “батанічны сад”? – пацікавілася я ў жанчыны.

– Нешта купляю, нечым мясцовыя жыхары дзеляцца. А з тым, каб расліна прынялася, праблем няма. У мяне, каб не ўрачы, лёгкая рука. Па знаку задыяка я Вадалей , – адказвае Тэрэза Аляксандраўна. Дабаўляе, што яна не адзіная сярод сваёй радні, хто меў і мае жаданне ствараць прыгажосць  за кошт кветак. Бабуля Фаіна мела вазоны ў хаце, разводзіла кветкі на ўчастку. Заўсёды выручала аднавяскоўцаў, калі  ім патрэбен быў букет з якой-небудзь нагоды. Прыхільнасць да кветак мае і сястра маці Тэрэзы Аляксандраўны, Валянціна Уладзіміраўна, якая жыве ў Калінінградскай вобласці. Калі прыязджае на малую радзіму на Лідчыну, абавязкова набывае саджанцы ці насенне кветак, каб потым пасадзіць іх у сябе. Захапленне ж Тэрэзы Аляксандраўны ідзе не толькі ёй на карысць, але і калектыву, у якім працуе.

А яшчэ Тэрэза Ашмяна ахвотна займаецца грамадскай работай. Яна з’яўляецца старастай вёскі Дзмітраўцы.