Разглядалася эфектыўнасць работы са зваротамі органаў улады Гродзенскай вобласці. У рабоце пашыранага пасяджэння ўзялі ўдзел парадку 700 удзельнікаў, у тым ліку ў анлайн-рэжыме. Папярэдні такога роду фармат сустрэчы парламентарыяў і органаў улады адбыўся напрыканцы 2021 года. Цяпер тэма зваротаў мае асаблівае значэнне. Ва ўмовах геапалітычнага супрацьстаяння дэпутаты і органы ўлады павінны быць у пастаянным кантакце з людзьмі, каб ведаць тыя праблемы і пытанні, якія ў іх узнікаюць.

Пасяджэнне Прэзідыума Савета Рэспублікі стала лагічным завяршэннем адзінага дня прыёму грамадзян і юрыдычных асоб у Гродзенскай вобласці сенатарамі на чале са Старшынёй Савета Рэспублікі Наталляй Качанавай. Яна зазначыла, што тэма зваротаў заўсёды актуальная для нашай краіны, бо арыентаваная на інтарэсы народа. І хаця формы работы з грамадзянамі пастаянна ўдасканальваюцца, у тым ліку задзейнічаны інтэрнэт-платформы, але нішто не заменіць жывога кантакту з людзьмі. Для канструктыўнага дыялогу важна слухаць і чуць адзін аднаго, каб прынятыя рашэнні садзейнічалі дабрабыту чалавека і дзяржавы.

Парламенцкі дэсант працаваў ва ўсіх раёнах Гродзеншчыны і абласнога цэнтра. Падчас пасяджэння быў зроблены аналіз сітуацыі ў рэгіёне.

Як зазначыла Наталля Качанава, у Гродзенскай вобласці работа са зваротамі грамадзян выбудавана эфектыўна. Адсюль у Савет Рэспублікі паступіла менш зваротаў, чым з іншых рэгіёнаў краіны. Тут усё дастаткова нядрэнна. Але разам з тым іх колькасць за восем месяцаў павялічылася.

Статыстыку агучыў начальнік аддзела па рабоце са зваротамі грамадзян Савета Рэспублікі Максім Шэко. Ён паведаміў, што за восем месяцаў у Савет Рэспублікі ад жыхароў Гродзенскай вобласці паступіла 455 зваротаў, што на 76 працэнтаў больш, чым летась. Па краіне — 4800 зваротаў, што таксама больш, чым у мінулым годзе. Рост назіраецца ў Брэсцкай, Гомельскай, Віцебскай, Магілёўскай абласцях, а вось па Мінскім раёне і сталіцы гэты паказчык знізіўся. Між тым удзельная вага зваротаў Гродзенскай вобласці застаецца самай мінімальнай на працягу названага перыяду — ад 6 да 9 працэнтаў. З рэгіёна часцей звяртаюцца жыхары абласнога цэнтра. А вось з Бераставіцкага раёна да сенатараў не паступіла ніводнага звароту.

Аналіз паказвае, што ў 2024 годзе гродзенцаў, як і большасць заяўнікаў, хвалюе стан ЖКГ і добраўпарадкаванне населеных пунктаў, ахова здароўя, землекарыстанне, працоўная занятасць, пытанні пенсіённага забеспячэння. Грамадзяне звярталіся ў асноўным індывідуальна, але нямала і калектыўных зваротаў. Яны разглядаліся дэпутатамі асабліва шчыльна. Як правіла, жыльцы дамоў наракаюць на адсутнасць рамонту і адцягванне тэрміну работ.

Некаторыя грамадзяне звяртаюцца да старшыні Савета Рэспублікі як да апошняй інстанцыі. У той жа час больш за 90 працэнтаў зваротаў — гэта праблемы мясцовага характару і павінны вырашацца на мясцовым узроўні. Напрыклад, з адной з вуліц Гродна грамадзяне звярнуліся з просьбай аб ліквідацыі стыхійнай паркоўкі. Пытанне было накіравана ў гарвыканкам, дзе быў прапанаваны варыянт долевога будаўніцтва. Сітуацыя з частковым фінансаваннем вырашылася ў Смаргоні, дзе грамадзяне робяць тратуар, а дзяржава асфальтуе дарогу.

Асноўныя пытанні, з якімі жыхары звяртаюцца да абласных улад, датычаць рамонту і эксплуатацыі жылля, добраўпарадкавання дваровых тэрыторый, пракладкі інжынерных сетак. Скардзяцца і на няякасную работу гарадскога і пасажырскага транспарту. 

У значнай ступені нараканні выкліканы недахопам рухомага саставу. Напрыклад, у Гродне з існуючых 900 адзінак аўтобусаў і тралейбусаў трэба замяніць 70 працэнтаў. Работа ў гэтым кірунку вядзецца. Сёлета ўрадам прынята рашэнне накіраваць сродкі на аднаўленне 10 працэнтаў гарадскога транспарту краіны, такая ж норма застанецца на наступны год.

Дарэчы, транспартная праблема ўзята пад асабісты кантроль Старшынёй Савета Рэспублікі. «Многае зроблена, і ўлады абавязаны ўтрымаць гэта на ўзроўні, развіваць надалей. Разам з тым не варта і замоўчваць праблемы, якія ёсць. Людзі прыходзяць з актуальнымі для іх пытаннямі, і да гэтага трэба ставіцца ўважліва. Нельга быць раўнадушнымі ў адносінах да грамадзян, займацца валакітай, адпіскамі і падманваць людзей. Гэта падрывае давер да ўлады. Таму лепш сказаць праўду, назваць канкрэтныя тэрміны выканання, няхай яны будуць не такія хуткія, але рэальныя. Тады і аўтарытэт мясцовых органаў улады будзе толькі расці», — акрэсліла сваю пазіцыю падчас пасяджэння Наталля Качанава.

Кіраўнік Лідскага райвыканкама Сяргей Ложачнік падзяліўся практыкай вырашэння жыллёва-камунальных праблем. Як вядома, менавіта гэтыя пытанні складаюць пераважную большасць зваротаў, у тым ліку і на Лідчыне. Таму гэта тэма адна з прыярытэтных у рабоце раённай улады. Тут не толькі ідуць па слядах зваротаў, але і працуюць на іх апярэджанне. Так, за два гады выканана значная работа па водазабеспячэнні: адбылася замена звыш 10 кіламетраў цеплавых сетак, прыведзены ў парадак прыдамавыя тэрыторыі, будуюцца станцыі абезжалезвання вады і тры ачышчальныя збудаванні, актыўна аднаўляецца жыллёвы фонд. За паўтара года адрамантавана звыш 24 км дарожнага палатна. Усё гэта зніжае колькасць зваротаў у дадзенай сферы.

А вось для сельскіх тэрыторый найбольш актуальнай тэмай з’яўляецца добраўпарадкаванне. Па гэтым шляху ідуць і ў Воранаўскім раёне. Па словах старшыні райсавета Алены Ганевіч, звароты напрамую звязаны з якасцю жыцця. Таму тут імкнуцца наводзіць парадак: закладваюць паркі, ліквідуюць трухлявыя дамы, на месцы даўгабудаў ствараюць спартыўныя, дзіцячыя і нават танцавальныя пляцоўкі. Рамантуюцца сацыяльныя аб’екты, школы, наводзіцца парадак на тэрыторыях, будуюцца арэндныя кватэры, каб стварыць умовы маладым спецыялістам. Дарэчы, замацаванасць кадраў у раёне складае 70 працэнтаў. Улады заняліся вырашэннем праблемы пітной вады, якая звязана са станам водаправодных сетак. Людзі бачаць, што іх праблемы вырашаюцца. Усё гэта садзейнічае зніжэнню сацыяльнай напружанасці, адпаведна зніжаецца і колькасць зваротаў, у тым ліку і ў самыя нізавыя структуры — сельскія Саветы.

Па словах старшыні Дзярэчынскага сельскага Савета Зэльвенскага раёна Аляксандра Белякалы, работу з насельніцтвам трэба весці пастаянна і ў розных фарматах. Таму тут практыкуюць выязныя прыёмы грамадзян, сельскія сходы, прамыя лініі. Усе разам — месцічы і ўлада — імкнуцца палепшыць жыццё ў сваіх населеных пунктах. На тэрыторыі сельскага Савета ўвасоблены два праекты грамадзянскіх ініцыятыў з удзелам мясцовых жыхароў.

У ходзе пасяджэння Наталля Качанава падкрэсліла, што на пытанне ўзаемадзеяння з насельніцтвам акцэнт робіцца заўсёды. Аб гэтым ішла гаворка і на нядаўняй нарадзе ў Прэзідэнта па ўнутрыпалітычных пытаннях развіцця дзяржавы. У прыватнасці, гаварылі аб тым, што дэпутаты любога ўзроўню павінны вельмі эфектыўна працаваць з людзьмі. «Прайшлі выбары, і ў мясцовыя Саветы дэпутатаў, як і ва ўсе іншыя ўзроўні, прыйшлі працаваць новыя людзі, якія павінны разумець важнасць гэтай работы і актуальнасць на сучасным этапе», — зазначыла старшыня Савета Рэспублікі.

Спікер паведаміла, што ў найбліжэйшы час асаблівая ўвага будзе ўдзелена пытанням развіцця аграгарадкоў і малых вёсак. «Прайшло пасяджэнне Савета па ўзаемадзеянні, дзе разглядалі пытанні замацавання кадраў у вёсцы. Мы створым рабочую групу, у якую ўвойдуць спецыялісты розных міністэрстваў і ведамстваў. Будзем выязджаць у аддаленыя рэгіёны нашай краіны, перш за ўсё гэта датычыцца сельскай мясцовасці: вёскі, аграгарадкі. І будзем глядзець, наколькі там эфектыўна вырашаюцца пытанні кадравага забеспячэння, будаўніцтва і выдзялення жылля, забеспячэння перш за ўсё работай, выплат заработнай платы. Важна, каб людзі там таксама жылі камфортна. Такі падыход будзе ў далейшым для нас той важнай работай, якая вызначыць перспектывы развіцця таго ці іншага населенага пункта ў сельскай мясцовасці», — сказала Наталля Качанава.

Як адзначыла Старшыня Савета Рэспублікі, не перашкаджае яшчэ раз звярнуць увагу дэпутацкага корпуса на важнасць работы з людзьмі. Трэба даць магчымасць кожнаму чалавеку быць пачутым і вырашыць пытанні, якія яго хвалююць. Таму была выказана прапанова праводзіць выязныя пашыраныя прыёмы грамадзян у рэгіёнах штомесячна.