Акцыя "Нашы дзеці" ўжо стала часткай беларускай культуры

Рэспубліканская навагодняя дабрачынная акцыя "Нашы дзеці" ўжо стала часткай беларускай культуры. Аб гэтым заявіла ў размове з журналістамі намеснік прэм'ер-міністра Беларусі Наталля Пяткевіч на старце акцыі, галоўнай пляцоўкай якой у гэтым годзе стаў Гомельскі палацава-паркавы ансамбль, перадае карэспандэнт БЕЛТА.

Паводле слоў віцэ-прэм'ера, акцыя "Нашы дзеці" мае вельмі глыбокі сэнс, яна шматаспектная. Наталля Пяткевіч адзначыла і асаблівую ўвагу беларускай дзяржавы да абароны, аховы дзяцінства.

"У свой час было прынята рашэнне аб тым, каб мы адыходзілі ад дзіцячых дамоў і замянялі іх дамамі сямейнага тыпу. І сёння ў нас у шэсць разоў скарацілася колькасць дзяцей, якія знаходзяцца ў дзіцячых дамах, і ў пяць разоў скарацілася колькасць дзіцячых дамоў. У нас усяго толькі іх сёння 10. Гэта вельмі значнае дасягненне", - сказала Наталля Пяткевіч.

Яна зрабіла акцэнт на тым, што акцыя "Нашы дзеці" ахоплівае ўсю краіну, практычна ўсе арганізацыі, усіх дарослых і дзяцей. "Усе гэтага чакаюць. Гэта свята! Але гэта і вялізная падрыхтоўка. Рыхтуюцца падарункі - гэта і аснашчэнне бальніц, і вырашэнне надзённых праблем", - падкрэсліла намеснік прэм'ер-міністра.

"Усе (прадстаўнікі арганізацый. - Заўвага БЕЛТА) разумеюць, што ў Новы год трэба прыйсці з падарункамі: і не з падарункамі-цукеркамі, а з падарункамі, якія вырашаюць праблемы", - дадала яна.

"Акцыя ўжо стала часткай нашай культуры. І мне здаецца, што найважнейшая мэта акцыі (у тым, што. - Заўвага БЕЛТА) мы падтрымліваем сямейныя каштоўнасці. Таму што мы паказваем дзецям мадэль паводзін, фарміруем культуру, як трэба разам адзначаць святы, разам з краінай, разам з сям'ёй, разам розным пакаленням", - упэўнена намеснік прэм'ер-міністра.

"Выдатная ідэя Прэзідэнта: да гэтага свята (падключыць. - Заўвага БЕЛТА) і іншы дзяржаўны праект - "Ад усёй душы", разлічаны на пажылых людзей. Мы гаворым аб тым, што мы дзяржава, мы сям'я, мы клапоцімся аб кожнай катэгорыі насельніцтва. Мы бачым усе праблемы, вырашаем праблемы будзённыя і ствараем святы", - звярнула ўвагу віцэ-прэм'ер.

Яна таксама адзначыла, што акцыі - гэта і развіццё культуры, і самарэалізацыя дзеячаў культуры, і развіццё навыкаў канцэртнай дзейнасці ў дзяцей. "Усе адчуваюць свята. На мой погляд, гэта здорава. І вось гэта вялікая палітыка", - рэзюмавала Наталля Пяткевіч.